Polşanyň wekili Iga Swýontek Maýamide geçirilýän Zenanlaryň tennis assosiasiýasynyň (WTA) ýaryşynyň ikinji aýlawynda şweýsariýaly Wiktoriýa Golubiçi utdy. Bu netije Swýontege ýaryş tamamlanandan soň dünýä reýtinginde birinji orny eýelemäge mümkinçilik berer, sebäbi dünýäniň birinji raketkasy awstraliýaly Eşli Barti öň karýerasyny tamamlaýandygyny mälim etdi diýip, TASS habar berýär.
Oýun ýaryşda ikinji belgide ýerleşdirilen Swýontegiň peýdasyna 6:2, 6:0 hasabynda tamamlandy. Indiki aýlawda ol amerikaly Medison Brengl bilen oýnar.
Maýamide ýaryş tamamlanandan soň Barti WTA-nyň reýtinginden çykarylar, Swýontek dünýäniň täze birinji raketkasy bolar. Häzirki wagtda onuň hasabynda 5 776 utuk bar. Reýtingiň birinji ornuna ýene bir dalaşgär – ispaniýaly Paola Badosa Maýamidäki ýaryşda ýeňiş gazanan ýagdaýynda-da Swýontegiň yzyndan ýetip bilmez.
Swýontek 20 ýaşynda, onuň hasabynda WTA-nyň howandarlygynda bäş titul bolup, ol 2020-nji ýylda geçirilen Fransiýanyň Açyk çempionatynyň ýeňijisidir. Swýontek WTA-nyň reýtinginde birinji orny eýeleýän Polşanyň ilkinji wekili bolar. Şeýle-de, ol guramanyň taryhynda dünýä reýtinginiň 28-nji lideri bolar.