Soňky wagtlar “akylly” sagatlar özleriniň adaty bolmadyk aýratynlyklary bilen geň galdyryp gelýärler. Şeýle bolansoň, ýakyn wagtda Samsung hem dakynylýan elektronikalar bazaryna üýtgeşik bir täzelik getirer diýlip garaşylýar. Bu hakynda LetsGoDigital-a salgylanyp, ferra.ru habar berýär.
Muny internet insaýderleri tarapyndan tapylan koreý kompaniýasynyň iň soňky patentine esaslanyp hem çaklamak bolýar. Resminamada aýdylmagyna görä, Samsung tegelek görnüşli, ýöne ulanyjynyň islegi boýunça süýri şekile geçip bilýän sagadyň üstünde işleýär. Bu bolsa enjamyň ekranynyň meýdanyny 40% giňeldýär.
Resminamada sagadyň şekilini üýtgetmegiň gapdal düwmä basmak, duýgur ekranyň ýüzüne basmak ýaly birnäçe ýolunyň bardygy aýdylýar. Ýöne gynansak-da, bu heniz diňe bir konsept bolup durýar. Ýöne Samsung-yň ozalky enjamlaryndan çen tutup, ýakyn wagtda şeýle “akylly” sagatlaryň döredilmegine garaşyp bolar.
