28-nji noýabrda paýtagtymyzda Ykdysady Hyzmatdaşlyk Guramasynyň 15-nji sammiti ýokary guramaçylyk ýagdaýynda üstünlikli geçirildi. YHG-nyň döredilen gününe bagyşlanyp geçirilen bu sammite gurama agza döwletleriň ýolbaşçylary, hökümet ýolbaşçylary gatnaşdylar. Türkmenistanyň Prezidentiniň teklibi bilen YHG-nyň ýörite baýragy döredilip, oňa birnaçe ugurlar boýunça mynasyp adamlary hödürlemek teklip edildi. Ykdysadyýet, medeniýet, sungat, taryh ýaly birnäçe ugurlar göz öňünde tutuldy. Agza döwletleriň hersinden bir görnükli adama bermek göz öňünde tutulan bu sylaga Türkmenistandan belli taryhçy alym Ýazgylyç Orazgylyjow mynasyp boldy.
TYA-nyň Magtymguly adyndaky Dil, edebiýat we milli golýazmalar institutynyň ylmy işgäri, taryh ylymlarynyň doktory Ýazgylyç Orazgylyjow taryhymyza degişli birnäçe ylmy işleriň üstünde işledi. Köpsanly şägirtler ýetişdirdi. Hormatly Prezidentimiz uzak ýyllaryň dowamynda çeken öndümli zähmetini göz öňünde tutup, alym Ýazgylyç Orazgylyjowy taryh, edebiýat, medeniýet ugurlary boýunca bu halkara sylagyna mynasyp gördi. 29-njy noýabrda 'Garagum' otelinde YHG-nyň 15-nji sammitiniň netijelerine bagyşlanan birifing-maslahatda görnükli türkmen alymyna bu sylag dabaraly ýagdaýda gowşuryldy. Sylagy YHG-nyň baş sekretary gowşurdy.
Alym Ýazgylyç Orazgylyjow bu uly sylaga mynasyp görlendigi üçin türkmen Liderine çuňňur hoşallygyny bildirdi.