Iýul aýynyň jemi boýunça täze ýeňil we ýeňil söwda awtomobilleriniň global satuwy ýyllyk hasabynda 6,3% azaldy. Muny LMC Automotive kompaniýasynyň maglumatlary delillendirýär diýip, Regnum habarlar agentligi habar berýär.
Şu ýylyň iýul aýynda dünýäde 6 mln 463 müň ýeňil awtomobil satyldy, bu 2020-nji ýylyň degişli aýynyň görkezijisinden 6,3% azdyr. Şol bir wagtyň özünde, ilkinji ýedi aýyň jemi boýunça bazar oňyn ösüşi görkezdi. Ýanwar aýyndan iýul aýy aralygynda ýeňil awtomobilleriň global satuwy 2020-nji ýyl bilen deňeşdirilende, 22% ýokarlandy.
Iýul aýynyň jemi boýunça awtomobil satuwy boýunça dünýä lideri Hytaý boldy, ol ýerde 1 mln 842 müň awtomobil satyldy. Milli bazarlaryň arasynda satuw möçberi boýunça ikinji orny 1 mln 278 müň awtomobil bilen ABŞ eýeledi.
Geçen aýda Günbatar Ýewropa ýurtlarynyň awtomobil bazarlary 23,8%, 1 mln 007 müň awtomobile çenli pese gaçdy. Gündogar Ýewropa ýurtlarynda awtomobil satuwy 346 müň birlige (-9,7%) barabar boldy. Günorta Amerikada 193,1 müň awtomobil satyldy (+0,4%). Dünýäniň iň uly awtomobil bazarlarynyň arasynda 371,8 müň awtomobil satuw netijesi bilen Ýaponiýany (-5,2%), Kanadany (155,9 müň awtomobil, -2,2%) we Koreýany (144,6 müň, -10,2%) hem belläp geçmek gerek.
LMC Automotive-iň hünärmenleri satuwyň pese gaçmagyny elektron bölekleriniň ýetmezçiligi bilen baglanyşdyrýarlar. Ýarym geçirijileriň ýetmezçilik etmegi dilerleriň ätiýaçlyklarynyň azalmagyna we awtomobil bahalarynyň ýokarlanmagyna getirýär.