GAR-da tapylan seýrek duş gelýän mawy reňkli almaz $40 milliona satyldy

GAR-da tapylan seýrek duş gelýän mawy reňkli almaz $40 milliona satyldy

Agramy 39,3 karat bolan seýrek duş gelýän gök reňkli almaz Günorta Afrikanyň Petra Diamonds dag-magdan gazyp alyjy kompaniýasy tarapyndan 40 mln dollara satyldy. Bu barada TASS-a salgylanyp, Trend habar berýär.

Bu daş dünýäniň gymmat bahaly daşlarynyň bazarynyň häzirkizaman taryhynda satylan iň gymmat işlenilmedik almazlaryň biri boldy. Sebäbi onuň her bir karaty üçin 1 mln dollardan gowrak tölendi diýip, agentlik belleýär. Almaz De Beers bilen Diacore kompaniýalarynyň bilelikdäki kärhanasy tarapyndan satyn alyndy. Kompaniýalaryň soňkusy Şteýnmes telekeçi maşgalasyna degişlidir.
Gök almaz aprel aýynda Pretoriýadan 40 km gündogarda, GAR-yň demirgazyk-gündogaryndaky “Kullinan” ýerasty şahtasyndan alyndy. 1905-nji ýylda agramy 3106 karat (621,35 gram) bolan dünýädäki iň uly almaz hem hut şu şahtada tapylypdy. Bu almaz “Kullinan” ýa-da “Afrikanyň ýyldyzy” ady bilen bellidir. Ony Transwaal koloniýasynyň hökümeti gollandiýaly zergärlere granlamagy tabşyran britan monarhy Eduard VII-ä hödürledi. Netijede, arassa we ak-gök reňkli daş dokuz bölege bölündi. Bu partiýadan iň uly almaz bolan 530 karat agramly “Kullinan-1” Londonyň Tauer galasynda saklanýan britan şa skipetrine goýuldy.

Şeýle hem okap bilersiňiz:
Dünýäde ululygy boýunça taryhda üçünji almaz tapyldy