Gonkongda uzynlygy 56 kilometr bolan iň uzyn we iň gymmat metro şahasynda otlular hereket edip başlady. Bu barada Hytaýyň bu ýörite administratiw sebitinde demir ýol ulaglarynyň operatory MTR korporasiýasy habar berdi. Muny Trend ýetirýär.
Gürrüň Gonkongyň Täze territoriýalarynyň günbatar we gündogar böleklerinde (şäheriň materik bölegi) hereket edýän iki liniýanyň birleşdirilmegi arkaly emele gelen Tuen Ma şahasy barada gidýär.
Ýedi stansiýany öz içine alýan 11 kilometrlik birleşdiriji bölegiň gurluşygy ençeme gezek yza süýşürildi we netijede 90,7 mlrd gonkong dollaryna ($11,7 mlrd) düşdi. Şeýlelik bilen, her kilometri çekmegiň bahasy 1 mlrd dollara ýetdi, bu hem şäheriň taryhynda iň gymmat demirýol taslamasy boldy.
2014-nji ýylyň aprel aýynda täze stansiýalaryň biriniň gurluşyk ýerinde taslamanyň bir ýyl yza süýşürilmegine sebäp bolan Sun dinastiýasy (960-1279) döwrüniň arheologiki ýadygärlikleri tapyldy.
Bu bölegiň ulanyşa girizilmegi bilen şäherde umumy uzynlygy 56 kilometr bolan iň uzyn şaha emele geldi. Ol 27 stansiýany özünde jemleýär. Şenbe güni Gonkongyň administrasiýasynyň ýolbaşçysy Kerri Lam täze liniýa boýunça inspeksion saparyny amala aşyrdy.
