Koronawirus pandemiýasy tutuş dünýä ýüzünde möhüm ekologiýa meselelerini hem ýüze çykardy. Işiň uzak aralykdan alnyp barylýan görnüşi we adamlaryň aragatnaşygy energiýanyň sarp edilişini we maglumat-aragatnaşyk tehnologiýalary pudagynyň kömürturşy gazynyň zyňyndylarynyň möçberini ýokarlandyrdy. Internet ägirtleriniň hereketleri planetany howanyň ählumumy maýlamagynyň howp astynda goýdy. Bu ugurdaky kompaniýalar boýunça hasabaty The Boston Consulting Group-yň (BCG) hünärmenleri işläp taýýarladylar. Ony lenta.ru saýtyna salgylanyp, trend.az ýetirýär.
Hyzmatlara islegiň barha artýan şertlerinde dünýä boýunça kömürturşy gazynyň zyňyndylarynyň 4 göterime çenlisi IT ulgamynyň paýyna düşýär. Bu görkeziji awiasiýanyňkydan iki esse ýokarydyr. Koronawirus howsalalylygyndan soň aragatnaşyk hyzmatlarynyň sarp edilişinde görnetin yza gaýtmalar görünmeýär diýip, BCG-nyň bilermenleri belleýärler.
2021-nji ýylda ählumumy derejede maglumatlary alyşmaga islegiň 60 göterime çenli ýokarlanmagyna garaşylýar. Eger-de ekologiýa ýetirilýän täsiriň öňüni almaga tarap hiç hili ädim ädilmese, 2040-njy ýyla çenli IT kompaniýalaryndan zyňyndylara düşýän paý 2-4 däl, eýsem, 14 göterim derejede bolar. Şoňa görä-de, alymlar IT kärhanalarynda ekologiýa durnuklylygynyň ilkinji orunda goýuljakdygyny belleýärler.
