Maks Werstappen ýekşenbe güni geçirilen Monako Gran Prisinde ýeňiş gazandy we karýerasynda ilkinji gezek "Formula 1-iň" sanawynda birinji orny eýeledi. Munuň özi onuň iň meşhur aýlawdaky ilkinji ýeňşi bolup durýar. Bu barada “Autoblog”-a salgylanyp, cursorinfo.co.il habar berýär.
Werstappen ýaryşa ikinji orundan başlady we Çarlz Leklerkiň mehaniki näsazlyk zerarly badalgadan ugrap bilmändigi sebäpli ýaryşy turuwbaşdan ele aldy. Ol Waltteri Bottasdan öňe geçip, möwsümdäki ikinji we karýerasyndaky 12-nji ýeňşini gazandy. “Red Bull”-yň sürüjisi "F1"-iň ýedi gezek çempiony Lýuis Hemiltony sanawda dört utuk tapawut bilen yzda galdyrdy.
“Bu master-klasdy we indi sen bu çempionatda öňde barýarsyň. Berekella, gardaş" diýip, "Red Bull" toparynyň ýolbaşçysy Kristian Horner pellehanadan geçip barýan Werstappene radioda gygyrdy.
“Mersedes” bolsa 2018-nji ýylda geçirilen Germaniýa Gran Prisinden bäri ilkinji gezek çempionatyň liderliginden aýryldy. Bu gezek Hemilton "Mersedes" topary üçin ýedinji orny eýeledi.
