“Toyota” ýapon awtoulag kompaniýasy “Stellantis” bileleşigi bilen hyzmatdaşlykda döredilen “Proace City” elektrik furgonyny resmi taýdan tanyşdyrdy. Bu barada procrossover.ru habar berdi.
“Proace City Electric” gabarasy boýunça özüniň adaty ýangyçly görnüşine doly meňzeş bolup, uzynlygy - esasy görnüşinde 4,4 metre we uzaldylan görnüşinde 4,75 metre barabardyr. Awtoulagyň ýük göterijilik ukyby - 750 kilogram. Mundan başga-da, onuň 7 orunlyk görnüşi bolan "Verso" hem bar. Onuň goş bölüminiň göwrümi 597 litr bolar. Şeýle-de bolsa, 5 orunlyk görnüşde goş bölüminiň göwrümi 850 litre çenli ýokarlanýar.
Tehniki bölegi barada aýdylanda bolsa, “Proace City Electric” awtoulagynyň üç režimi bar. Eko režiminde onuň kuwwaty 82 at güýjüne deňdir we adaty režime geçende kuwwat 109 at güýjüne çenli ýokarlanýar. Power režiminde bolsa sagatda 135 km aňrybaş tizlik bilen 136 at güýjüne ýetýär.
“Proace City Electric” elektrik furgonynyň ýol ätiýaçlygy 260-280 kilometre barabardyr. Öndürijileriň pikiriçe, munuň özi şäher režimi we haryt daşamak üçin ýeterlik. ÝB-de “Proace City Electric”-iň satuwy 2021-nji ýylyň ahyrynda başlar.