Günorta Koreýanyň LG Electronics korporasiýasy ykjam telefonlaryň bazaryndan gidýändigini mälim etdi diýip, kompaniýanyň hasabatyna salgylanyp, Yonhap agentligi habar berýär. Muny astera.ru ýetirýär.
Agentligiň maglumatlaryna görä, karar bu biznesiň ýitgililigi we ýokary bäsdeşlik bilen baglanyşykly. LG Electronics özüniň mobil bölümini ýapmazdan ozal, ony beýleki kompaniýalara satmaga synanyşdy. Ýöne alyjy tapylmady, şonuň üçin LG Electronics smartfon önümçiligini bes etmek kararyna geldi. Kompaniýa ykjam gurluşlar bölümini 2021-nji ýylyň 31-nji iýulyna çenli doly ýapmagy meýilleşdirýär.
Smartfonlary işläp düzmegiň we öndürmegiň deregine kompaniýa “akylly” öý ulgamyny işläp düzmäge, emeli intellekte we elektromobiller üçin komponentleri taýýarlamaga üns berer.
Belläp geçsek, soňky alty ýylda kompaniýanyň mobil bölümi 4,5 mlrd dollar möçberde zyýan çekdi. Öň kompaniýa bazarda diňe Samsung we Apple-den yza galyp, üçünji orny eýeleýärdi.
LG Electronics korporasiýasy LG Group-yň bir bölegidir. Ol 1958-nji ýylda esaslandyryldy, ýöne häzirki ady bilen 1995-nji ýyldan bäri hereket edýär. Kompaniýanyň önümlerine dürli hojalyk-durmuş enjamlary, telewizor, kompýuter we şuňa meňzeş dewaýslar, geçiriji gurluşlar, akylly enjamlar, smartfonlar we başgalar girýär.
