2025-nji ýylda Ýeriň pes orbitasynda dünýädäki ilkinji kosmos myhmanhanasy Voyager Station-yň gurluşygyna başlamak meýilleşdirilýär. Gurluşyk Orbital Assembly Corporation (OAC) kompaniýasy tarapyndan amala aşyrylar. Myhmanhana eýýäm 2027-nji ýylda işe başlap biler diýip, 3dnews.ru habar berýär.
Myhmanhananyň gurluşynda restoran, kinoteatr we spa-salon göz öňünde tutulýar, onuň sygymy 400 adama barabar bolar. OAC-yň meýilnamalaryna görä, stansiýa uly tegelek görnüşinde bolup, emeli dartylma güýjüni döretmek üçin aýlanar. Stansiýanyň korpusynyň daşynda syýahatçylary ýerleşdirmek üçin köp sanly kapsulalar gurlar. Kapsulalaryň käbiri ABŞ-nyň Milli aeronawtika we kosmos giňişliginiň derňewi boýunça edarasyna (NASA) hem-de Ýewropanyň kosmos agentligine (ESA) satylyp bilner.
Şeýle-de, döwlet guramalary stansiýany öz ylmy modulyny ýerleşdirmek üçin ýa-da Marsa uçmaga taýýarlanýan kosmonawtlar üçin okuw merkezi hökmünde ulanyp bilerler.
Häzirki wagtda kosmos stansiýasynyň gurluşyk bahasy ýa-da myhmanhana otagynyň bahasy barada jikme-jik maglumatlar ýok.