Madridiň "Realynyň" baş tälimçisi Zinedin Zidan toparyň hüjümçisi Karim Benzemany taryhda iň gowy fransuz hüjümçisi hasaplaýandygyny aýtdy.
"Hawa, meniň üçin ol iň gowusy. Ol muny görkezip ýör, özi-de eýýäm uzak wagt bäri "Realda" çykyş edýär. Ol 500-den gowrak oýun oýnap, köp gollar geçirdi. Netijede, onuň eden işleri hem özi hakynda aýdyp berýär. Meniň üçin ol iň gowusy. Bu düşnükli zat.
Häzir ol has tejribeli oýunçy. Ol, Ronaldudaky ýaly, arassa 9-lyk däl. Diňe gol hakda pikir etmeýär we şonuň üçinem men oňa ýokary baha berýärin"-diýip, Marca neşiri Zidanyň sözlerini getirýär.
Ýatlap geçsek, Benzema "Realyň" bilbaoly "Atletik"-e garşy geçen soňky oýnunda iki gol geçirip, dubl bilen tapawutlandy hem-de toparyna ýeňiş getirdi.