Polşada ýerleşýän Milli ýat institutynyň sahypasynda barlagçylaryň arhiwlerde Jeýms Bond atly britaniýaly hakynda maglumat tapandyklary baradaky habar peýda boldy. Bu barada discover24.ru habar berýär.
Neşir edilen maglumatlara laýyklykda, Jeýms Albert Bond 1964-nji ýylyň 18-nji fewralynda Polşa barýar. Ol britan ilçihanasynda harby attaşe wezipesini eýeleýär. Institutyň ylmy işgärleri Bonduň suratyny hem ýerleşdirdiler. Olar onuň arhiw sekretary bolup işländigini belleýärler.
Resminamalarda britaniýalynyň özüni seresaply alyp barandygy we aýallar bilen gyzyklanandygy, ýöne polýaklar bilen gatnaşyk etmezlige çalşandygy görkezilýär. 1964-nji ýylyň güýzünde Bond Olştynda we Belostokda ýerleşen harby desgalara barmaga synanyşýar.
Şol wagta çenli iňlis ýazyjysy Ýan Flemingiň 007 agenti Jeýms Bond baradaky ähli kitaplary diýen ýaly çapdan çykypdy we olaryň birnäçesi ekranlaşdyrylypdy.
Gözegçilik Bonda işini ýerine ýetirmäge päsgel beren bolsa gerek, şonuň üçin ol geleninden bir ýyl geçmän, 1965-nji ýylyň 21-nji ýanwarynda Polşany terk edýär. Polşa syýahatynda ýoldaş bolan Bonduň dul aýaly Janett Takki “The Telegraph” gazetine adamsynyň, hakykatdan hem, içaly bolandygyny aýtdy.
Awgustda 007 agenti baradaky filmleriň muşdaklary aktýor Şon Konnerini taryhda iň gowy Jeýms Bond diýip atlandyrdylar. Bu ses bermäge gatnaşan 14 müňden gowrak adamdan ybarat bolan kinomanlaryň köpüsiniň pikiridi. Konneri kinoda ilkinji 007 agenti boldy. Ol kinosaganyň bäş filminde surata düşdi.