Dünýäde COVID-19 pandemiýasy döräli bäri, koronawirus bilen baglanyşykly kesellerden ýogalanlaryň sany duşenbe gününiň ýagdaýy boýunça, 1 mln 002 müň 383 adama ýetdi diýip, Worldometer portaly habar berdi. Muny interfax.ru ýetirýär.
Dünýädäki möhüm hadysalar boýunça statistika bilen meşgullanýan portalyň maglumatlaryna görä, dünýäde kesellänleriň sany 33 mln 303 müň 209 adama barabar boldy, 24,6 mln adam sagaldy.
4 mln we ondan hem köp COVID-19 ýagdaýy resmi hasaba alnan ýurtlaryň hataryna ABŞ, Hindistan we Braziliýa girdi.
ABŞ-da 7 mln 321 müň 343 kesel ýagdaýy ýüze çykaryldy, 209 müň 453 adam ýogaldy, 4,56 mln adam sagaldy.
Kesellänleriň sany boýunça ikinji orunda Hindistan durýar, ol ýerde 6 mln 073 müň 348 keselli hasaba alyndy, 95 müň 547 adam ýogaldy we 5 mln adam sagaldy.
Braziliýada kesellänleriň sany 4 mln 732 müň 309 adama ýetdi, 141 müň 776 adam ýogaldy, 4 mln 060 müň 088 adam sagaldy.
Planetanyň her 1 mln ýaşaýjysyna COVID-19-dan ölüm derejesi 128,6 boldy. ABŞ-da ýurduň ilatynyň 1 millionyna 632 adam, Hindistanda – 69, Braziliýada – 666 adam ýogaldy.
Bütindünýä saglygy goraýyş guramasy ölüm sanynyň 2 milliona çenli ýokarlanyp biljekdigi baradaky pikiri aradan aýyrmaýardy. BSGG koronawirusa garşy köpçülikleýin sanjym başlamazyndan ozal, dünýä şeýle görkezijä ýetip biler diýip hasaplaýar. Häzir köp ýurtlarda ýokanç keselleriň täze ösüşi bellige alynýar. Ysraýyl ilkinji bolup karantini gaýtadan girizdi.
