Türkmenistanda Gazagystan bilen ulag we logistika pudagynda hyzmatdaşlygyň çägindäki bilelikdäki taslamanyň çygrynda, Gazagystanyň serhedine çenli awtoulag ýolunyň we Garabogaz aýlagynyň üstünden geçýän köpriniň gurluşygy alnyp barylýar. Bu barada Trend habar berýär.
Gazagystanyň Daşary işler ministrligi bu taslamanyň durmuşa geçirilmeginiň ulag akymyny artdyryp, goňşy ýurtlaryň arasyndaky haryt dolanyşygyny ýokarlandyrjakdygyny aýtdy.
"Bu taslama iki ýurduň arasyndaky dostlugyň ýene bir aýdyň nyşanyna öwrüler" - diýip, goňşy ýurduň Daşary işler ministrliginde bellenilýär.
Mälim bolşy ýaly, ýurtlaryň arasynda ýük gatnawy Gazagystan-Türkmenistan-Eýran demir ýolunyň ugry boýunça eýýäm amala aşyrylýar. Bu ýol halkara hyzmatdaşlygy ösdürmek babatda täze mümkinçilikler açyp, Demirgazyk bilen Günortany hem-de Gündogar bilen Günbatary birleşdirýän möhüm ulag geçelgesine öwrüldi.