Kiodo habarlar agentliginiň berýän maglumatyna görä, Ýaponiýanyň premýer-ministri Sindzo Abe iş dolandyryjy topara işden gitmek karary barada aýtdy. Ol ýerine adam saýlanýança öz borçlaryny ýerine ýetirer. Bu barada RIA Nowosti habar berýär.
Ondan öň, habar beriş serişdeleri Abeniň saglygynyň ýaramazlaşýandygy barada ýazypdy. Agentligiň habaryna görä, şu gün ol muny tassyklady.
Agentligiň berýän habarynda "Abe bilen duşuşyga gatnaşan wekilleriň biri onuň işinden çekilmeginiň sebäbiniň "kesel zerarly dogry karar kabul edip bilmezlikdigini" aýtdy" diýilýär.
Sindzo Abede başly kolit keseli bar. Bu kesel 2007-nji ýylda onuň işden gitmegine sebäp bolupdy. Soňra onuň ýagdaýy kadalaşdy we 2012-nji ýylda ýene premýer-ministr saýlandy.
24-nji awgustda onuň iş möhleti 2799 günden geçdi, bu bolsa Ýaponiýanyň hökümet baştutanlarynyň arasynda iň uzak döwürdir.
Ýakynda onuň keseliniň güýçlenýändigi belli boldy, soňky günlerde premýer-ministr iki gezek klinika baryp gördi.
Abe syýasatçylar maşgalasyndan. Onuň kakasy Şintaro Abe (1924-1991) 1982-1986-njy ýyllar aralygynda Daşary işler ministri, atasy Nobusuke Kişi (1896-1987) 1957-1960-njy ýyllar aralygynda Ýaponiýanyň premýer-ministri, daýysy Eisaku Sato (1901-1975) hem 1964-nji ýyldan 1972-nji ýyla çenli premýer-ministr wezipesinde işlediler.