“Nusaý”, “Bürgüt” we “Gala” türkmen brendleri bir wagtda köp gezeklik gorag maskaly erkek eşiklerini satuwa çykardylar. Täze eşikler ýakynda paýtagtyň “Altyn Asyr” söwda merkezinde we Dokma senagaty ministrliginiň täze dükanlarynda alyjylar köpçüligine elýeterli edildi. Bu barada ORIENT habar berýär.
Täze egin-eşik ugry üç zady özünde jemleýär – biri-biri bilen reňk we stil taýdan sazlaşýan futbolka, papak we mata maskalary. Täze egin-eşik kombinasiýasyndan orun alan bu gorag maskalary beýleki adaty hem-de birsydyrgyn şahsy gorag serişdelerinden düýpgöter tapawutlanýarlar. Köp gezeklik maskalar dünýäde eýýäm millionlarça adamyň durmuşynda berk ornaşdy, şonuň üçin moda markalary bu täze “garderob elementi” bilen işjeň synaglary alyp barýarlar.
Adaty lukmançylyk maskalaryndan tapawutlylykda, mata maskalaryny gaýtadan ulanyp bolýar. Şeýle-de bolsa, olary günde azyndan bir gezek, eger mümkinçilik bar bolsa, dem almanyň netijesinde çygjaran badyna ýuwmak maslahat berilýär.
Iýul aýynyň birinji ýarymynda Saglygy goraýyş we derman senagaty ministrligi howanyň düzüminiň üýtgemegi baradaky habarlardan soň bada-bat Türkmenistanyň raýatlaryna ýokary dem alyş ýollaryny goramagy maslahat berdi. Şeýle hem, maska düzgüni ýurtda täze koronawirusa garşy göreşmek we dessin çäre görmek boýunça öňüni alyş çäresi bolup durýar.
