Türkmenistan Hytaýa turbageçiriji gazyny iberýän iň iri ýurt bolmagynda galýar

Türkmenistan Hytaýa turbageçiriji gazyny iberýän iň iri ýurt bolmagynda galýar

Türkmenistan Hytaýa turbageçiriji gazyny ugradýan iň iri üpjün ediji hökmündäki ornuny saklaýar. Bu barada Russiýanyň «Interfax» habar gullugynyň Hytaýyň gümrük gullugynyň maglumatlaryna esaslanýan habaryna salgylanyp, ORIENT habar berýär.
Habarda dünýä bazarynda satylan turbageçiriji tebigy gazynyň mukdary boýunça Türkmenistanyň iň uly üpjün edijidigi bellenilýär. 2019-njy ýylda “Türkmengaz” döwlet konserni Hytaýa 31,2 milliard kub metr gaz iberdi we 2020-nji ýylyň aprelinde üpjünçiligiň derejesi her gün üçin 69 million kub metre barabar boldy.
Şeýle hem, “Interfax”, “Gazpromyň” “Sibiriň güýji” bilen üpjün edýän gazynyň Hytaý bazarynda beýleki turbageçirijileriň arasynda iň arzany bolandygyny belläp geçdi.
Ikinji çärýekde, rus ýangyjynyň bahasy birinji çärýek bilen deňeşdirilende, 10%, ýagny müň kub metr üçin 183 ABŞ dollaryna çenli arzanlady. Bahalar her çärýekde üýtgeýär, şertnama ýangyç ýagynyň we gazyň bahasy bilen baglylykda, dokuz aý yza galýar. Deňeşdirmek üçin: aprel aýynda Türkmenistandan iberilýän gazyň bahasy 227 ABŞ dollary, Özbegistandan - 212 ABŞ dollary, Gazagystandan - 194 ABŞ dollary, Mýanmadan - 1 müň kub metr üçin 365 ABŞ dollary.
“Gazprom” 2019-njy ýylda, ýagny “Türkmengazdan” 10 ýyl soň Hytaýa gaz iberip başlady.