«Koenigsegg Jesko Absolut» giperkary seriýaly awtoulaglar üçin çärýek we ýarym mil aralyklarynda tizligiň iki rekordyny goýdy.
Kompaniýanyň Ängelholm şäherindäki uçuş meýdançasynda awtoulag 402 metr aralygy 8,54 sekuntda geçip, 305 km/sag tizlik görkezijisine ýetdi.
805 metr aralyk bolsa 12,76 sekuntda geçildi we onda iň ýokary tizlik 373 km/sag boldy.
Bu netijeler seriýaly awtoulaglaryň arasynda, elektrik hereketlendirijisi bolmadyk ulaglar üçin hem görkezilen aralyklardaky iň ýokary tizlik, hem-de geçiş wagty boýunça rekord hasaplanyldy.
Ýaryşlar standart zawod şinalarynda we uçuş-gonuş zolagynyň taýýarlanmadyk örtüginde geçirildi. Ulagy zawodyň sürüjisi Markus Lund dolandyrdy, görkezijiler bolsa «Racelogic» ölçeg toplumy tarapyndan hasaba alyndy we tassyklanyldy.
Kompaniýa bu netijelere programma üpjünçiliginiň täzelenen sazlamalarynyň kömegi bilen ýetilendigini habar berdi. Güýç gurluşynyň täze kalibrlemeleri «Jesko Absolut-yň» eýelerine simsiz täzeleme arkaly elýeterli bolar.
Model 1622 at güýjüne çenli kuwwatlylygy bolan 5,1 litrlik V8 hereketlendirijisi we yzky çekiji bilen enjamlaşdyrylandyr. 2025-nji ýylda «Jesko Absolut» şeýle hem 0–400–0 km/sag maşkynda elektrikli «Rimac Nevera R» giperkarynyň netijesinden geçip, rekord goýupdy.
