Mýanmanyň demirgazyk-gündogaryndaky binalaryň birinde bolan güýçli partlama netijesinde 46 adam wepat boldy, olaryň alty sanysy çagalardyr. Şeýle hem ýene-de 74 adam şikes alyp, Namhkam okrugynyň hassahanasyna ýerleşdirildi. Bu barada wakanyň bolan ýerinde işlän halasgärlere salgylanyp, Associated Press we The Washington Post (WP) habar berýär.
Partlama 31-nji maýda gündiz Namhkam okrugynyň Kaungtup obasynda boldy. Halasgärleriň berýän maglumatlaryna görä, şol binada magdan gazyp alyjy senagatda ulanylýan partlaýjy maddalar (käbir maglumatlara görä, gelignit) saklanan bolup biler. Wakanyň anyk sebäpleri häzirki wagtda derňelýär.
Şol günüň agşamyna çenli halasgärler wepat bolanlaryň 46 sanysynyň jesedini tapdy. Gözleg-halas ediş çäreleri häzirki wagtda hem dowam etdirilýär.
Halasgärleriň biriniň aýtmagyna görä, partlama ilatly punkta hem örän uly zyýan ýetirdi: wakanyň bolan ýeriniň golaýynda ýerleşýän 100-den gowrak ýaşaýyş jaýyna zeper ýetdi.
Bu wakanyň ýüze çykan sebiti Hytaýyň serhedinden, takmynan, üç kilometr günortada ýerleşýär.
