Madridde dünýäde sport «Oskary» diýlip atlandyrylýan Laureus baýragynyň gowşurylyş dabarasy geçirildi. 2025-nji ýylyň netijeleri boýunça iň gowy türgenler diýlip tennisçiler — Belarusyň wekili Arina Sobolenko we ispaniýaly Karlos Alkaras ykrar edildi.
Ýylyň iň gowy zenan türgeni ugrundaky bäsleşikde Sobolenko «Barselonanyň» futbolçysy Aýtana Bonmati, amerikaly ýeňil atletikaçy Melissa Jeferson-Wuden, keniýaly ýeňil atletikaçy Feýt Kipýegon, amerikaly suwda ýüzüji Keti Ledeki we onuň watandaşy ýeňil atletikaçy Sidni Maklaflin-Lewron ýaly güýçli bäsdeşlerinden öňe geçmegi başardy.
Erkekleriň arasyndaky nominasiýada Alkarasdan başga-da, baýraga şwesiýaly syrykly böküji Arman Dýuplantis, «Pari Sen-Žermeniň» fransuz futbolçysy Usman Dembele, ispaniýaly moto-ýaryşa gatnaşyjy Mark Markes, sloweniýaly welosipedçi Tadeý Pogaçar we italiýaly tennisçi Ýannik Sinner dalaş etdi.
«Ýylyň ýaş türgeni» diýlip «Barselonanyň» 18 ýaşly ispaniýaly hüjümçisi Lamin Ýamal ykrar edildi. Futbolçy baýragy kabul edip alanda maşgalasyna we toparyna minnetdarlyk bildirip, bu sylagyň ony öňe gitmäge höweslendirjekdigini belledi. Ol öz çykyşynda watandaşy Karlos Alkarasy hem mynasyp ýeňşi bilen gutlady.
Belläp geçsek, bir ýyl mundan ozal Ýamal eýýäm bu baýragyň «Ýylyň öňegidişligi» kategoriýasynda ýeňiji bolupdy. 2025-nji ýylyň netijesi boýunça bolsa, bu kategoriýada baýragy Formula-1-iň «Maklaren» toparyndan britaniýaly sürüji Lando Norris aldy.
