Real American Freestyle (RAF) erkin göreş promouşeniniň metbugat gullugy UFC-niň orta agramda häzirki çempiony, 31 ýaşly Hamzat Çimaýew bilen şertnama baglaşylandygyny resmi taýdan yglan etdi. Bu täzelik guramanyň sekizinji belgili ýaryşynyň dowamynda mälim edildi.
UFC-de BAE-niň baýdagy astynda çykyş edýän Çimaýew professional garyşyk söweş sungatynda (MMA) 15-0 rekordy bilen ýeňilmezekligini saklap gelýär. Onuň hasabynda ýedi sany submişn, bäş sany nokaut we eminleriň karary bilen gazanylan üç sany ýeňiş bar. Hamzat MMA-nyň taryhynda iň güýçli pälwanlaryň biri hasaplanýar.
Türgeniň Dana Waýtyň ligasyndaky karýerasy 2020-nji ýylda Jon Fillipsi demikdiriji usul bilen ýeňmegi we täsirli debýuty bilen başlandy. Indi bolsa UFC-niň öňdebaryjy türgenleriniň biri öz güýjüni ýöriteleşdirilen RAF göreş promouşeninde synap görer.
9-njy maýda Nýuarkda (ABŞ) geçiriljek UFC 328 turniriniň baş tutluşygynda Çimaýew Şon Striklende garşy söweşde ilkinji gezek öz guşagyny gorar. Şol söweşiň netijesine garamazdan, Hamzatyň RAF ligasyndaky debýuty ondan soňra bolar.
