FIFA-nyň prezidenti Janni Infantino 2026-njy ýylyň dünýä çempionatynyň oýunlaryna biletleriň gymmat bolmagynyň guramanyň maliýe gurluşy bilen baglydygyny, sebäbi bu ýaryşyň gurama üçin ýeke-täk girdeji çeşmesidigni mälim etdi.
Federasiýanyň ýolbaşçysynyň sözlerine görä, çempionatyň geçirilýän bir aýynyň dowamynda gazanylan serişdeler FIFA-nyň indiki dört ýyllyk döwürdäki işini doly üpjün etmelidir.
«FIFA-nyň esasy we häzirlikçe ýeke-täk girdeji çeşmesi — futbol boýunça dünýä çempionatydyr. Biz bir aýyň dowamynda girdeji alýarys, indiki dünýä çempionatyna çenli galan 47 aýyň dowamynda bolsa şol serişdeleri sarp edýäris» diýip, «L’Équipe» neşiri Infantinonyň sözlerini getirýär.
Şu sebäpli, aprel aýynda FIFA nyrh syýasatyna gaýtadan seretdi: indi DÇ-2026-nyň final oýunyna iň gymmat biletleriň bahasy 10 müň dollardan geçýär. Şeýle-de, ikinji we üçünji derejeli biletleriň bahalarynyň degişlilikde 7,3 müň we 5,7 müň dollara çenli ýokarlanandygy hasaba alyndy.
ABŞ-nyň, Meksikanyň we Kanadanyň bilelikde kabul etjek geljekki dünýä çempionaty taryhy waka bolar. Ilkinji gezek ýaryşyň final tapgyryna 48 sany milli ýygyndy topar gatnaşar, bu bolsa ýaryşyň gerimini we guramaçylyk işleriniň çylşyrymlylygyny ep-esli artdyrýar.
