Madridiň «Atletiko» klubunyň baş tälimçisi Diego Simeone we onuň aýaly Karla Pereýra Madridde 180 kwartiradan we ýedi sany willadan ybarat bolan ägirt uly gozgalmaýan emläk toplumyny eýelik edýärler. Bu barada «Gazeta Express» neşiri habar berýär.
Çeşmäniň berýän maglumatyna görä, bu maşgala şäheriň iň abraýly etraplaryndaky kaşaň ýaşaýyş jaýlaryna işjeň maýa goýýarlar we bu desgalary kärendesine bermek hem-de soňra gaýtadan satmak arkaly uly girdeji gazanýarlar.
Diego Simeone eýýäm 15 ýyldan bäri Madridiň klubuna ýolbaşçylyk edip gelýär we dünýä futbolynyň iň ýokary hak tölenýän tälimçileriniň hatarynda yzygiderli orun alýar. Argentinaly hünärmen 2011-nji ýylyň 23-nji dekabrynda bu wezipä bellenipdi. Onuň ýolbaşçylygynda topar iki gezek Ispaniýanyň çempiony boldy, ýurduň Kubogyny eýeledi we iki gezek Ýewropa ligasynda ýeňiş gazandy.
Tälimçiniň klub bilen baglaşan häzirki şertnamasy 2027-nji ýylyň tomsuna çenli hereket edýär.
Hünärmeniň şahsy durmuşy hem Ispaniýanyň paýtagty bilen berk baglanyşyklydyr. Ol özüniň ikinji aýaly Karla Pereýra bilen 2014-nji ýylda tanyşdy, 2019-njy ýylda durmuş gurdy we häzirki wagtda Françeska we Walentina atly iki gyzyny terbiýeleýärler. Şeýle-de Simeoneniň birinji nikasyndan Jowanni, Janluka we Juliano atly üç ogly bar. Kiçi ogly Juliano häzirki wagtda kakasynyň ýolbaşçylygynda «Atletikoda» hüjümçi ýarym goragçy hökmünde çykyş edýär.
