«The Last of Us» we «Narko» seriallary boýunça meöhur bolan aktýor Pedro Paskal «Chanel» moda öýüniň täze ýüzi boldy. Bu barada ol özüniň sosial ulgamlaryndaky sahypalarynda habar berdi.
Täze hyzmatdaşlygyň çäginde ýörite wideorolik hödürlendi. Onda Paskal brendiň dizaýnyndaky lybasda — goýy gyzyl žemperde we gara balakda fotobudkada surata düşýär.
Aktýor paýlaşan maglumatynyň aşagyndaky teswirlerde brendiň kreatiw direktory Matýe Blaziniň işine bolan gyzyklanmasyny bildirdi we onuň dizaýnerçilik garaýyşlaryny güýçli, nepis hem-de ylham beriji diýip atlandyrdy. Paskalyň sözlerine görä, dizaýner tarapyndan döredilen älemde «her kim özi üçin ýakyn bolan bir zady tapyp biler». Öz gezeginde, Blazi Pedrony «ajaýyp ynsan we täsin aktýor» diýip häsiýetlendirdi. Dizaýner: «Onuň mähirliligi, zehini we dünýä bolan garaýşy şol bir wagtyň özünde özüne çekiji we ylham berijidir» diýip belledi.
Bellemeli zat, Matýe Blaziniň ýolbaşçylygynda moda öýi Golliwudyň erkek ýyldyzlaryny hyzmatdaşlyga has işjeň çekip başlady. Mundan ozal «Chanel» Timoti Şalame, Kendrik Lamar we A$AP Rocky ýaly meşhurlar bilen hem hyzmatdaşlyk edipdi. Kompaniýanyň häli-şindi aýratyn erkek adamlar üçin lybaslar hatarynyň ýokdugyna garamazdan, Blazi brendiň erkek modasyndaky ornuny giňeltmegini dowam edýär.
