«Inter Maýaminiň» we Argentinanyň milli ýygyndysynyň hüjümçisi Lionel Messi Ispaniýanyň üçünji diwizionynda çykyş edýän «Kornelýa» futbol klubunyň eýesi boldy.
Toparyň metbugat gullugynyň resmi beýanyna we insaýder Fabrisio Romanonyň berýän maglumatlaryna görä, 38 ýaşly futbolçy klubuň paýnamalarynyň 100%-ini satyn aldy. Bu bolsa klubuň sport we ykdysady taýdan ösmegine itergi bermelidir.
KHBS-iň belleýşi ýaly, bu şertnama bilen Messiniň Kriştianu Ronaldu bilen sport bäsdeşligi indi işewürlik ugruna geçýär: mundan ozal, 2026-njy ýylyň fewralynda portugaliýaly futbolçy Ispaniýanyň «Almeriýa» klubunyň paýnamalarynyň 25%-ini satyn alypdy.
«Kornelýanyň» satyn alynmagynyň maliýe şertleri aýan edilmeýär, ýöne Messiniň şeýle maýa goýumlary amala aşyrmak üçin uly serişdeleriniň bardygy mälimdir. Onuň «Inter Maýamidäki» paýyny hem goşanyňda, ýyllyk girdejisi 150 million dollar möçberinde bahalandyrylýar. Şeýle hem, Adidas bilen hemişelik şertnamasy we PepsiCo hem-de Mastercard ýaly brendler bilen hyzmatdaşlygy oňa her ýyl goşmaça 70 million dollar töweregi peýda getirýär.
Häzirki wagtda Messi «Sportico» neşiriniň wersiýasyna görä, ähli döwürleriň iň ýokary hak tölenýän türgenleriniň reýtinginde bäşinji orunda durýar. Ol inflýasiýany hasaba alanyňda karýerasynda 1,62 milliard dollar gazandy. Klub satyn almakdan başga-da, argentinaly türgen özüniň Mas+ içgisini çykarmak we 525 Rosario prodýuserlik kompaniýasyny açmak ýaly işewürlik taslamalaryny hem işjeň ösdürýär.
