Türkmenistanyň Halk Maslahatynyň Başlygy Gurbanguly Berdimuhamedow Awstriýa amala aşyran saparynyň dowamynda Atom energiýasy boýunça halkara agentligiň (AEHA) Baş direktory Rafael Grossi bilen duşuşdy diýip, TDH habar berýär.
Gepleşikleriň dowamynda esasy üns atom energiýasyny parahatçylykly maksatlar üçin ulanmak we milli saglygy goraýyş ulgamyna keselleri anyklamagyň we bejermegiň döwrebap usullaryny ornaşdyrmak meselelerine gönükdirildi.
Söhbetdeşligiň dowamynda 2026–2030-njy ýyllar üçin tehniki hyzmatdaşlygyň ileri tutulýan ugurlaryny kesgitlejek ýurt boýunça täze Çarçuwaly maksatnamany taýýarlamak meselelerine hem garaldy. Bu resminama ýadro lukmançylygyna innowasion tehnologiýalary ornaşdyrmaga, şeýle hem halk hojalygynyň dürli pudaklarynda howpsuzlyk derejesini ýokarlandyrmaga gönükdirilen geljegi uly taslamalary amala aşyrmak üçin ygtybarly binýat bolar.
Gurbanguly Berdimuhamedow Türkmenistanyň atom energiýasynyň diňe parahatçylykly maksatlar üçin ulanylmagynyň tarapdarydygyny nygtady.
Merkezi Aziýada ýadro ýaragyndan azat zolak hakyndaky Şertnama gol çekilmeginiň we Türkmenistanyň agentlige agza bolmagynyň şanly senelerine bagyşlanan ýokary derejedäki sebit forumyny Aşgabatda guramak teklip edildi.
Rafael Grossi Türkmenistanyň ýadro howpsuzlygy ýörelgelerine ygrarlylygy we ekologik durnuklylygy berkitmek baradaky başlangyçlary goldaýandygy üçin minnetdarlyk bildirdi.
Taraplar innowasion tehnologiýalary lukmançylyga ornaşdyrmaga we ýurduň saglygy goraýyş edaralarynda hyzmatlaryň hilini ýokarlandyrmaga mümkinçilik berýän tehniki hyzmatdaşlygyň möhümdigini belledi. Şeýle hem deňze çykalgasy bolmadyk ösüp barýan ýurtlara beriljek goldawlar barada pikir alşyldy, sebäbi parahatçylykly atomdan peýdalanmak mümkinçiligi olar üçin durnukly ösüş guralyna öwrülip biler.
