Angliýada meşhur italýan suratkeşi Rafael Santiniň galamyndan çykan diýlip çaklanylýan «Mariýa Magdalena» atly täze bir surat eseri ýüze çykaryldy. Open Science neşiriniň habar berşi ýaly, ýöne bu açyş Palatina galereýasyna degişli bolan we uzak wagtlap Pýetro Perujino tarapyndan döredilen diýlip hasaplanyp gelnen meňzeş eseri şübhe astyna alýar.
Bu eser şu çaka çenli başga bir suratkeşe degişli diýlip ýalňyş hasap edildi. Has anygy, onuň üstündäki soňraky goşulan reňk gatlaklary asyl nusgany gizlän bolup çykdy. Alymlar bu suratyň Rafaeliniňkidigini subut etmek üçin himiýa-fiziki seljerme geçirip, boýaglaryň düzümini öwrendiler, şeýle-de arhiwdäki, Fransesko Mariýa II della Röwere aradan çykandan soň «Mariýa Magdalena» suratynyň ady geçýän Urbino gersogynyň resminamalaryny gaýtadan seljerdiler.
Haçan-da eseri infragyzyl surata düşürmek usuly ulanylanda, awtoryň işiň dowamynda ýüz keşpde we kompozisiýada eden käbir düzedişleri ýüze çykdy. Bu bolsa onuň asyl nusgadygyny görkezýär. Sebäbi Florensiýadaky nusgada şeýle kysmy döredijilik yzlary ýokdur.
Täze tapylan eserde reňk gatlaklary örän inçe we «S. Maria Madalena» diýen ýazgyda latyn dili däl-de, şol döwrüň adaty halk dili ulanylypdyr.
Eger alymlaryň bu ylmy netijeleri gutarnykly tassyklansa, onda Galkynyş döwrüniň iň esasy eserleriniň awtorlygy täzeden gözden geçiriler. Bu bolsa sungat taryhynda uly bir öwrülişik bolar.
