Floridadaky Palm-Biç şäheriniň halkara howa menziline ABŞ-nyň Prezidenti Donald Trampyň adyny dakmak göz öňünde tutulýar. Degişli permana 30-njy martda ştatyň gubernatory, respublikaçy Ron DeSantis gol çekdi.
Mundan öň bu çözgüdi ştatyň parlamentiniň iki palatasy hem goldapdy. CNN neşiriniň ýazmagyna görä, bu karar Federal awiasiýa administrasiýasyndaky (Federal Aviation Administration — FAA) degişli amallardan soň, 1-nji iýuldan güýje girer diýlip garaşylýar.
FAA aeroportlaryň atlarynyň ştat derejesinde tassyklanýandygyny, ýöne edaranyň karta we maglumatlar binýadyna üýtgeşmeler girizmelidigini habar berdi.
Bu başlangyç makullanandan soň, The Trump Organization kompaniýasy awiagatnawlar bilen bagly harytlar we hyzmatlar üçin söwda belgisini hasaba aldyrmaga arza tabşyrdy. Şol bir wagtyň özünde, kompaniýa ABŞ-nyň Prezidentiniň we onuň maşgalasynyň howa menziliniň adynyň üýtgemeginden «hiç hili awtorlyk sylagyny, ygtyýarnama töleglerini ýa-da maliýe öwez tölegini almajakdyklaryny» aýratyn nygtady.
