ABŞ-nyň Prezidenti Donald Tramp Maýami şäherinde gurulmagy meýilleşdirilýän prezident kitaphanasynyň we muzeýiniň taslamasyny tanyşdyrdy. Emeli aňyň kömegi bilen döredilen suratlar we wideo onuň «Truth Social» sosial ulgamyndaky akkauntynda ýerleşdirildi.
Taslama altyn derweze görnüşli girişi bolan, 50 gatly aýnaly gökdirän binanyň gurluşygyny göz öňünde tutýar.
Hödürlenen maglumatlara görä, binanyň girelge zalynda «Air Force One» prezident uçaryny we ABŞ-nyň Harby-howa güýçleriniň beýleki uçarlaryny ýerleşdirmek meýilleşdirilýär. Amfiteatr görnüşinde gurlan zallaryň birinde bolsa Trampyň uly altyn heýkelini oturtmak göz öňünde tutulan. Toplumyň üçeginde bolsa Ak tamyň bagynyň nusgasy dörediler.
Prezidentiň ogly Erik Tramp X sosial ulgamynda bu taslamanyň işlenip düzülmegine soňky alty aýyň dowamynda işjeň gatnaşandygyny habar berdi. Onuň aýtmagyna görä, bu toplum «ajaýyp ynsanyň, görnükli gurluşykçynyň we ýurdumyzyň taryhyndaky iň beýik Prezidentiň asyrlyk şaýady bolar».
Bloomberg neşiriniň maglumatlaryna görä, gurluşyk Maýaminiň merkezinde, meýdany 10,6 müň inedördül metrden gowrak bolan ýer böleginde alnyp barlar. Bu ýer Florida ştatynyň häkimiýetleri tarapyndan Trampa berildi. Taslamanyň bahasy 100 million dollara ýetip biler, gurluşygyň bolsa ýakyn bäş ýylyň dowamynda başlanmagyna garaşylýar.
