Alymlar Ýuwaş ummanda janly-jandarlaryň täze 38 görnüşini we täze bolup biljek 28 görnüşini tapdy. Bu barada Nippon Foundation gaznasy we «Nekton» kompaniýasy tarapyndan durmuşa geçirilýän «Ocean Census» taslamasynyň saýtynda habar berilýär.
Barlaglar Ýaponiýanyň az öwrenilen iki sany çuň suwly sebitinde — Nankaý çöketliginde we Sitiýe suwasty dag ulgamynda geçirildi. Ekipažly «Shinkai 6500» enjamy deňiz organizmleriniň 528-den gowrak nusgasyny ýygnady.
Nankaý çöketligine bolan ekspedisiýa doktor Çong Çen ýolbaşçylyk etdi. Bu sebit Tokionyň 500–600 km günorta-günbatarynda ýerleşýär we ýokary geologik işjeňligi bilen tapawutlanýar. Bu ýerde deňiz düýbüniň jaýryklaryndan sowuk çüwdürimler (çeşmeler) urlup çykýar — çuňlukdan ýüzüne metan we kükürtli wodoroda baý suwuklyklar galýar. Bu sebitdäki janly organizmleriň topary energiýany Günüň şöhlelerinden däl-de, eýsem himiki reaksiýalaryň hasabyna alýar.
Ozal şeýle çeşmelerde ýaşaýan jandarlaryň 14 görnüşi mälim bolan bolsa, indi olaryň sany 80-e ýetirildi. Olaryň arasynda:
- Mollýuskalaryň 33 görnüşi, şol sanda ulitkalar, iki taraply mollýuskalar we ýalpyldawuk gurçuk;
- Halkaly gurçuklaryň 23 görnüşi;
- Bognaýaklylaryň 11 görnüşi — leňňeçşekilliler (leňňeçler, krewetkalar we amfipodalar);
- Nemertinleriň 5 görnüşi (lenta-gurçuklar);
- Tikenekderilileriň 4 görnüşi (deňiz ýyldyzlary, ofiuralar we deňiz hyýarlary);
- Çümýän öýjüklileriň 3 görnüşi (zooantidalar, anemonlar we gidroidler);
- Mşankanyň (Bryozoa) 1 görnüşi.
Sitiýe sebitinde alymlar korall jemgyýetlerini we gubkalaryň ýaşaýan ýerlerini tapdy. Şeýle hem çüýşe gubkasynyň içinde ýaşaýan köp ösüntgili gurçuklaryň täze iki görnüşi beýan edildi we omarlaryň täze bäş görnüşi tapyldy.
