Paleontologlar mundan 3 million ýyl ozal Gündogar Afrikada ýaşan we gadymy adamlary awlan bolmagy juda ähtimal äpet krokodiliň täze görnüşini anykladylar. Bu görnüşe «Lýusiniň awçysy» diýen manyny berýän Crocodylus lucivenator diýlip at berildi. Barlagyň netijeleri hakda Journal of Systematic Palaeontology žurnalynda okamak mümkin.
Aýowa uniwersitetiniň alymlary Efiopiýanyň Afar sebitindäki Hadar düzlüginden tapylan 121 sany gazylyp alnan nusgany, esasan hem kelleçanaklary we äň süňklerini öwrendiler. ÝUNESKO-nyň Bütindünýä mirasynyň sanawyna girýän bu sebit ynsan ewolýusiýasynyň irki döwürlerine degişli tapyndylary bilen meşhurdyr.
Barlaglara görä, bu krokodil takmynan 3,4-3 million ýyl ozal — meşhur Lýusä degişli bolan afar awstralopitekleriniň ýaşan döwründe we şol bir sebitlerde ýaşapdyr.
Uly ýaşly krokodilleriň uzynlygy 4–4,5 metre, agramy bolsa 270-den 600 kilograma çenli ýetipdir. Derýalary, kölleri we kenarýaka tokaýlary özünde jemleýän tebigy künjek bolan Hadarda bu görnüş iň esasy ýyrtyjy hasaplanypdyr.
Aýowa uniwersitetiniň professory Kristofer Broşu bu hakda beren gürrüňinde: «Bu krokodiliň Lýusiniň nesillerini awlandygyny şübhelenmän aýdyp bileris» diýip, ynamly belleýär.
Haýwanyň burnunda gözeilginç süňk ösüntgisi bolup, alymlar ony erkek krokodilleriň öz jübütleriniň ünsüni çekmek üçin ulanandygyny çaklaýarlar. Şeýle hem, tapylan äňleriň birinde ýara yzlarynyň bolmagy krokodilleriň özara darkaşlaryndan habar berýär.
