ABŞ-nyň häkimiýetleri grin-kart (Green Card) lotereýasyna gatnaşmagyň düzgünlerini üýtgetmegi meýilleşdirýär. Täze talaplar 2026-njy ýylyň 10-njy aprelinde güýje girip biler we olar eýýäm «DV-2027» utuşy üçin ulanylar. Bu mümkin bolan özgerişlikler barada ABŞ-nyň Federal sanawy (Federal Register) habar berdi.
Täze taslama görä, «Diversity Visa» maksatnamasyna gatnaşmak üçin taraplardan hereket edýän daşary ýurt pasportynyň bolmagy talap ediler. Arzany tabşyran wagtynda pasportyň maglumatlaryny görkezmek we onuň suratly sahypasynyň skanirlenen nusgasyny (elektron görnüşini) ýüklemek gerek bolar. Bu maglumatlar bolmasa arza kabul edilmez. Kadadan çykmalar diňe käbir aýratyn şahslar (meselem, raýatlygy bolmadyklar) üçin göz öňünde tutulypdyr.
Şeýle hem, arza tabşyrmak üçin 1 dollar möçberinde simwoliki töleg girizmek teklip edilýär. Mundan başga-da, sowalnamany doldurmak üçin berilýän wagty 30 minutdan 90 minuta çenli köpeltmek meýilleşdirilýär.
Maksatnamanyň düzgünlerinde käbir adalgalar hem üýtgedilip biler. Meselem, «gender» we «ýaş» sözleriniň deregine «biologik jyns» we «doglan senesi» ýaly has takyk sözleri ulanmak teklip edilýär. Ilçihanalar üçin gözükdirijilerde bolsa dalaşgärleriň maglumatlaryny has düýpli barlamak borjy berkidiler.
Gatnaşyjylar üçin üýtgemeýän talaplar:
1.Bilim derejesini görkezmeli;
2.Maşgala agzalaryny we ýanýoldaşyny dogry bellemeli;
3.Ilçihanalardaky söhbetdeşlikde bu maglumatlary tassyklamaly;
4.Iňlis dilini bilmek şert däl.
ABŞ-nyň häkimiýetleriniň maglumatyna görä, «DV-2025» utuşy wagtynda 2,5 milliona golaý şübheli we gaýtalanýan arzalar anyklanypdyr. Täze çäreler galplyklary we gaýtadan hasaba durmak synanyşyklaryny azaltmaga gönükdirilendir.
Grin-kart (Green Card) — bu ABŞ-da hemişelik ýaşamaga hukuk berýän resmi şahsyýetnamadyr. Ol ýurtda çäklendirmesiz işlemäge, durmuş ýeňilliklerinden peýdalanmaga we geljekde raýatlyk üçin arza bermäge mümkinçilik berýär.
Bilşimiz ýaly, «DV-2026» utuşy üçin hasaba alyş eýýäm tamamlandy (ol 2024-nji ýylyň 2-nji oktýabryndan 7-nji noýabryna çenli dowam etdi). Indiki utuş «DV-2027» bolar, onuň takyk seneleri häzirlikçe resmi taýdan yglan edilmedi.
