«Kanadanyň Toronto şäherinde howply ekologik ýagdaý ýüze çykdy. Gyşyň dowamynda köçelerden çykarylan äpet gar topbagy daşky gurşawa zyýan ýetirmek howpuny salýar» diýip, The Guardian neşiri habar berýär.
Ýanwar aýynda şähere bir gije-gündiziň dowamynda takmynan 58 santimetr ýagyn düşüp, rekord derejedäki gar hasaba alyndy. Kommunal gulluklar ýollardan, ýanýodalardan we welosiped ýodalaryndan 264 müň tonna gar çykardylar we şäher çetinde topbaklap goýdular.
Şäheriň demirgazyk-günbataryndaky meýdançalaryň birinde takmynan 200 inedördül metr meýdany tutýan 144 müň kub metr gar saklanýar. Bu üýşmekler häzir hem eremän dur.
Gar massasy diňe buzdan ybarat bolman, onuň düzüminde ýol duzy, antifriz, motor ýagy, hojalyk zibilleri we beýleki hapalaýjy maddalaryň garyndysy hem bar.
Şäher gulluklary möwsümde 130 müň tonnadan gowrak duz ulandylar. Hususy awtoduralgalarda we ýollarda ulanylan reagentleriň bolsa hasaby-da näbelli.
Toronto uniwersitetiniň ekologiýa boýunça professory Donald Jeksonyň we doktor Loren Lousonyň geçiren barlaglary howply ýagdaýy ýüze çykardy. Netijede barlag geçirilen ýerleriň 30%-indäki hlorid konsentrasiýasynyň suwdaky organizmleriniň köpüsi üçin heläkçilikli derejä ýetendigi mälim boldy. Käbir ýerlerde bu görkeziji hatda deňziň suwundakydan hem ýokary boldy.
Eger bu garlar erese, düzümindäki duz hiç hili arassalanmazdan göni suw ulgamlaryna aralaşar. Maýylganlyk bu ýagdaýy has-da kynlaşdyryp, toplanan ähli hapalaýjylary derýalara we beýleki suw howdanlaryna akdyryp äkider.
