Rolls-Royce Boat Tail britan markasynyň häzirki zaman awtoulaglarynyň arasynda iň gymmady hasaplanýar. Çaklamalara görä, şeýle ulaglaryň biriniň bahasy takmynan 28 million dollara ýetýär.
Ozal Rolls-Royce ulaglary üçin iň ýokary bahalar seýrek duş gelýän antikwar nusgalaryň bäsleşikli söwdalarynda hasaba alynýardy. 1910–1930-njy ýyllaryň kolleksiýa modelleri köplenç 5–7 million dollar aralygynda satylýar. Olaryň arasynda 5,7 million dollara satylan 1933-nji ýylyň Phantom II Special Town Car modeli we 7,2 million dollara bahalanan 1926-njy ýylyň Phantom I Round Door modeli bar. Şeýle-de, 1963-nji ýylyň synag üçin goýberilen 10EX Touring Limousine modeli 2018-nji ýylda 7,3 million dollara satyn alyndy.
Emma häzirki zaman rekordlary hususy buýurmalar esasynda awtoulaglary döredýän Coachbuild bölümi bilen baglydyr. Boat Tail modeli hem hut şol ýerde işlenip düzüldi.
Aslynda, Boat Tail-iň üç sanysy bolup, olaryň her biri aýratyn taslama esasynda taýýarlanyldy. Kompaniýa ulaglaryň eýeleriniň adyny aýan etmeýär. Ýöne olaryň biriniň Jay-Z bilen Beyonsa degişlidigi baradaky resmi taýdan tassyklanylmadyk myş-myşlar bar.
Modeliň dizaýny J-klasly ýahtalardan ylham alnyp döredilen. Korpusy mikrokristally çylşyrymly gradiýent reňki bilen reňklenen, yzky meýdançasynda bolsa simmetrik Caleidolegno şpony ulanylan.
Awtoulagyň esasy aýratynlygy onuň «ganat» bolup açylýan yzky bölegindedir. Onuň içinde Armand de Brignac şampan çakyrlary üçin sowadyjylar, bokallar toplumy, eplenýän stollar, oturgyçlar we saýawanly dynç alyş bölegi bar. Ýörite interýer üçin dizaýnyna üç ýyldan gowrak wagt giden Bovet sagatlary döredildi.
Ikinji Boat Tail awtoulagy 2022-nji ýylda Concorso d’Eleganza sergisinde görkezildi. Üçünji nusgasyny bolsa kompaniýa köpçülige asla tanyşdyrmady.
