La Liga Ispaniýanyň futbol taryhyna bagyşlanan «Retro Matchday» (Retro oýun güni) atly taryhda ilkinji gezek geçiriljek aksiýany yglan etdi.
Resmi habara görä, 10-njy aprelden 13-nji aprel aralygynda La Ligadan (31-nji tapgyr) we Segundadan (35-nji tapgyr) jemi 38 klub meýdança öňki ýyllaryň dizaýnlaryndan ylham alnyp taýýarlanan lybaslarda çykar. Diňe bir oýunçylar däl, eýsem eminler hem ýörite egin-eşik bilen üpjün ediler. Hatda oýunlaryň teleýaýlymlardaky görkezişleri hem «retro» stilindäki grafika bilen bezeler.
Gatnaşyjy toparlaryň lybaslaryny 19-njy martda Madriddäki Modalar hepdeliginde tanyşdyrmak meýilleşdirilýär.
«Mundo Deportivo» neşiriniň «COPE» radiostansiýasyna salgylanyp berýän maglumatyna görä, «Barselona» we «Real» bu çärä gatnaşmazlar. Katalonlaryň kluby tehniki sebäplere görä, ýagny «retro» lybaslaryny häzirki möwsüm üçin wagtynda taýýarlap we sertifikasiýadan geçirip bilmändigi üçin bu gezekki aksiýadan ýüz öwürdi. Emma topar geljek ýyl bu taslama goşulmagy meýilleşdirýär.
«Real» bolsa bu başlangyja goşulmandygy sebäpli çärä gatnaşmaýar. Şeýle-de, «Raýo Walýekano» we «Hetafe» klublary hem bu taslamadan ýüz öwürdiler.
