Brand Finance konsalting kompaniýasy dünýäniň iň gymmat 500 bank brendiniň her ýylky reýtingini hödürledi.
Hytaýyň Industrial Commercial Bank of China (ICBC) banky reýtingiň lideri bolmagynda galýar. Bir ýylyň dowamynda bu bankyň brendiniň bahasy 14,9% artyp, 90,8 milliard dollara ýetdi.
Ikinji orunda China Construction Bank ýerleşýär — onuň brendiniň bahasy 1,5% aşaklap, 77,181 milliard dollary düzdi.
Üçünji orny Bank of China eýeledi, ol brendiniň bahasyny 10,9% artdyryp, 70,8 milliard dollara ýetirmegi başardy. Şunlukda, ol brendiniň bahasy 10,6% azalan we 62,8 milliard dollara düşen Agricultural Bank of China bankyndan öňe geçdi.
Umuman alanyňda, reýtingiň ilkinji ýüzlügine Hytaýyň 15 sany banky girdi.
Sanawda BRICS ýurtlarynyň banklary hem bar: Russiýanyň «Sber» banky (61-nji orun), Hindistanyň HDFC Bank (41-nji orun) we Axis Bank (96-njy orun) banklary. Reýtingde BAE-niň banklary — Emirates NBD (71-nji), FAB (77-nji) we ADCB (93-nji), şeýle hem Braziliýanyň Banco do Brasil (85-nji), Bradesco (90-njy) we Nubank (98-nji) ýaly banklary hem bar.
Brand Finance bu reýtingi düzeninde «roýaltiden boşatmak» usulyny ulanýar. Bu usul, eger brend başga bir gurama degişli bolan bolsa, kompaniýanyň öz brendini ulanandygy üçin näçe töläp biljekdigini bahalandyrmaga mümkinçilik berýär.
