Italiýada meşhur heýkeltaraş Mikelanjelo Buonarrotiniň öň näbelli bolan 20 sany işi ýüze çykaryldy. Erkin sungat taryhçysy Walentina Salernonyň geçiren barlaglarynyň netijesinde bu eserleriň asyl nusgadygy tassyklanyldy diýip, Il Messaggero neşiri habar berýär.
Salerno özüniň «Mikelanjelo: soňky günler» atly işinde Italiýadaky we daşary ýurtlardaky onlarça arhiw resminamalaryny öwrenmek arkaly ägirdiň ömrüniň soňky ýyllaryny gaýtadan dikeltdi. Onuň netijelerine görä, Mikelanjelo öň çaklanylyşy ýaly, Rimdäki öýünde saklanan ýüzlerçe çyzgylaryny we heýkellerini ýok etmän, eýsem şägirtlerine we ýakynlaryna olary gizlin ýerde saklamagy tabşyrypdyr. Tapylan resminamalaryň birinde olaryň gizlenen we birnäçe açar ulgamy bolan otag barada agzalýar. Ýöne häzirki wagtda şol otag boş dur.
«Döwlet arhiwinde we Watikanda saklanýan 500 ýyllyk resminamalary öwrenmek we deňeşdirmek arkaly, Galkynyş döwrüniň ussat heýkeltaraşyna degişli azyndan ýigrimi sany täze eseriň asyl nusgadygyny tassyklaýan taryhy zynjyry yzarlamak başartdy» diýip, makalada bellenilýär. Bu barlagy Keramatly Syryň Lateran kanonikler-regulýarlar Ordeni we professor Mikele Rak, şeýle-de, halkara ylmy komitetini döreden Keramatly Pýotr ybadathanasynyň kardinal-arhipreswiteri Mauro Gambetti hem goldady.
Şol bir wagtyň özünde, Italiýanyň Finestre sull'Arte neşiri bu makala tankydy syn ýazyp, alymyň netijelerine şübhe bildirdi. Tankyt, Salernonyň anyk eserleriň adyny tutmaýandygyna we şol 20 işiň takyk sanawynyň ýokdugyna, şeýle-de onuň tapan resminamalarynyň beýleki barlagçylara öňdenem mälimdigine esaslanýar. Neşir resminamalaryň beýle görnüşde düşündirilmeginiň jedel döredip biljekdigini nygtaýar.
Gürrüň häzirki wagtda muzeýlerde, buthanalarda we hususy toplumlarda bar bolan, ýöne öň Mikelanjelonyňky hökmünde doly kesgitlenmedik eserler barada gidýär.
