ABŞ-nyň Florida ştatyndaky Melburn-Biç kenarynyň golaýynda, siliň suwuny akdyrýan lagym ulgamynda gysylyp galan 185 kilogramlyk äpet lamantin tapyldy.
New York Post neşiriniň habar bermegine görä, bu deňiz süýdemdirijisini Melburn-Biç kärhanasynyň bir işgäri görüp, derrew degişli gulluklara habar beripdir. Wakanyň bolan ýerinde halas edijiler bilen bir hatarda, Florida ştatynyň Balyk we ýabany tebigaty goramak boýunça komissiýasynyň agzalary hem-de Florida uniwersitetiniň hünärmenleri agyr halas ediş işlerini geçirdiler. Lagymdan aman-sag çykarylan jandar derrew Orlando şäherindäki «Sea World» okeanariumyna getirildi. Häzirki wagtda oňa zerur bolan kömekler edilýär.
Okeanariumyň işgärleri lamantiniň eýýäm özbaşdak dem alyp, işjeň hereket edýändigini we işdämen iýmitlenýändigini aýdýarlar.
«Hünärmenlerimiz jandaryň özüni has oňaýly duýmagy we suwuň ýüzünde ýeňil saklanmagy üçin howuzdaky suwuň derejesini ýörite sazlaýarlar» diýip, «Sea World Orlando» okeanariumynyň metbugat wekili Stefani Beçara belledi.
ABŞ-da lamantinler döwlet tarapyndan goralýan jandarlaryň sanawyna girýär. Bu haýwanlaryň sany 2021-nji ýylda bolup geçen we 1100-den gowrak lamantiniň heläk bolmagyna sebäp bolan köpçülikleýin açlykdan soň, häzirki wagtda kem-kemden köpelip başlady. Şeýle halas ediş çäreleri bu täsin jandarlaryň populýasiýasyny saklap galmakda uly ähmiýete eýedir.
