Portugaliýanyň hökümetiniň we senagat guramalarynyň berýän deslapky maglumatlaryna görä, ýanwar-fewral aýlarynda ýurda inen tupanlaryň ýetiren umumy maddy zyýany 5,5 milliard ýewrodan aşdy. Iň uly ýitgiler döwlet we şahsy emläklere degişli bolup, olaryň möçberi 4,5 milliard ýewrodan gowrak diýlip kesgitlenilýär. Ýurduň işewürlik pudagynyň hem bu harasatlardan çeken zyýany ep-esli boldy.
Ykdysadyýet ministri Manuel Kastro Almeýdan kompaniýalaryň öz ýitgilerini takmynan 1 milliard ýewro golaý diýip hasaplaýandyklaryny aýdýar. Eýýäm 4 müňden gowrak kärhana we emlägine zyýan ýeten 11 müňe golaý şahsy tarap döwletden kompensasiýa sorap arza tabşyrdy.
Ýurda iň uly weýrançylygy getiren Kristin, Leonardo we Marta atly tupanlar boldy. Bu tebigy hadysalar azyndan 16 sany adam pidasyna, 700-den gowrak adamyň dürli derejeli şikes almagyna sebäp boldy.
Şeýle-de güýçli ýel we suw joşgunlary köp sebitlerde elektrik energiýasynyň kesilmegine, aragatnaşyk ulgamlarynyň sandan çykmagyna getirdi. Howply zolaklardan 1200-den gowrak adam ewakuasiýa edildi.
Geçen ýekşenbe güni hökümet ýurda girizilen adatdan daşary ýagdaý düzgünini ýatyrdy. Emma duşenbe gününden başlap, ýerli häkimiýetler bu kararyň wagtyndan öň berlendigini aýdyp, nägilelik bildirdiler. Olaryň pikiriçe, dikeldiş işleri entek tamamlanmady, töwekgelçilikli ýagdaýlar şindi hem aradan aýrylmady.
