Şemalyň tizligi sagatda 178 km: Portugaliýada «Kristin» harasaty...

Duýdansyz gelen «Kristin» harasaty Portugaliýada suw joşgunlaryna, weýrançylyklara we elektrik energiýasynyň köpçülikleýin kesilmegine sebäp boldy. BBC gullugynyň habar bermegine görä, tupanda azyndan bäş adam heläk boldy.
Atlantik siklony ýurduň merkezine we demirgazyk sebitlerine zarba urdy. E-Redes energetika kompaniýasynyň maglumatynda 28-nji ýanwarda 850 müňden gowrak sarp ediji elektrik enjamlarynyň üpjünçisiz galandygyny aýdylýar.
Köp sanly ilatly nokatlarda şemalyň tizligi sagatda 150 km-e golaýlady.
Portugaliýanyň häkimiýetleri bu harasaty «adatdan daşary howa hadysasy» diýip häsiýetlendirdiler. Mekdepler ýapyldy. Binalara zeper ýetendigi we ulag ulgamynda bökdençlikleriň ýüze çykandygy hasaba alyndy. Raýat goranyş gullugy tutuş ýurt boýunça 3000-den gowrak weýrançylyk häsiýetli wakany bellige aldy. Agaçlaryň we gurluşyk bölekleriniň gaçmagy netijesinde birnäçe adama şikes düşdi.
Leýriýa sebitindäki Monti-Real awiabazasynda şemalyň tizligi sagatda 178 km-e ýetdi, bu bolsa meteorologik enjamlaryň doly hatardan çykmagyna getirdi. Awtomobil we demir ýollaryna, şol sanda Lissabon bilen ýurduň demirgazygyndaky esasy magistrala hem zeper ýetdi.
Koimbra we Leýriýanyň häkimiýetleri ýaşaýjylara öýlerinden çykmazlygy maslahat berdiler. Figeýra-da-Foş kenarýaka şäherinde güýçli ýel attraksiony agdardy, awtoulaglara zeper ýetirdi we bir binanyň üçek bölegini goparyp taşlady.
«Kristin» harasaty Portugaliýadan soň Ispaniýa tarap süýşdi we ol ýere-de güýçli ýagyş, gar hem-de şemal getirdi. Andalusiýada halas edijiler gutulgysyz howa şertleri bilen bagly 2000-e golaý wakany hasaba aldylar.