Täze Hyundai Santa Fe-niň prototipi synag wagty ot aldy. Kompaniýa sebäbini derňeýär

Günorta Koreýada ýol synaglary wagtynda täze nesil Hyundai Santa Fe awtomobiliniň prototipi ýandy. Waka kompaniýanyň Ulsandaky önümçilik merkeziniň golaýynda bolup geçdi. Bu ýerde Hyundai täzelenen modeli synagdan geçirýär.
Carscoops-yň habar bermegine görä, ýangyn heniz önümçilige taýýar bolmadyk ulagyň täzelenen wersiýasynyň irki synag tapgyrynda boldy. Ýerli KHBS-iň maglumatlaryna görä, sürüji tutuş awtomobili ot almanka, ulagdan çykyp ýetişdi. Wakanyň bolan ýerine gelen ýangyn söndürijiler düýpli zeper ýetmäniň öňüni alyp bilmedi: olar gelýänçä ýangyn zerarly awtomobiliň öň böleginden nam-nyşan galmady diýen ýaly.
Iň uly zyýan hereketlendiriji bölegine ýetdi. Ýangynyň hem hut hereketlendirijiniň golaýynda başlandygy çaklanylýar.
Hyundai ýangyny tassyklady we wakanyň sebäpleriniň derňelýändigini habar berdi. Kompaniýa prototipiň tehniki taraplary barada maglumat bermedi we ulaga güýç enjamynyň haýsy görnüşiniň oturdylandygyny hem aýtmady.
Täzelenen Santa Fe-niň resmi aýratynlyklary entek belli däl. Insaýderleriň çaklamalaryna görä, model ýol ätiýajy artdyrylan wersiýa eýe bolup biler. Şeýle-de, käbir bazarlarda benzin we gibrid görnüşleriniň elýeterli bolmagyna garaşylýar.
Täzelenen Hyundai Santa Fe 2027-nji model ýylyndan ir çykmasa gerek.