2026-njy ýylyň güýzünde ABŞ-da taryhda ilkinji Watançylaryň oýunlary (Patriot Games) geçiriler. ABŞ-nyň Prezidenti Donald Tramp sport ýaryşlarynyň Birleşen Ştatlaryň 250 ýyllygynyň baýram edilmegine gabat geljekdigini aýtdy diýip, CNN belleýär.
«Güýzde biz taryhda ilkinji “Watançylaryň oýunlaryny” – iň gowy ýokary synp türgenleriniň, ýurduň her ştatyndan we territoriýasyndan bir ýetginjek oglanyň we gyzyň gatnaşmagynda dört günlük sport çäresini geçireris» — diýip, Tramp wideo ýüzlenmesinde aýtdy.
Köp internet ulanyjylary ýaryşyň şeýle formatyny «Açlyk oýunlary» kitap we film seriýasy bilen baglanyşdyrdy, çünki onda hem hökümet öz sebitlerine wekilçilik edýän ýetginjekleriň gatnaşmagynda ýaryş geçirýär.
Şol ýüzlenmesinde Prezident Waşingtonyň merkezinde Triumf arkasynyň amerikan görnüşini gurmak meýilnamalary barada aýtdy.
«Biz Triumf arkasy bolmadyk ýeke-täk uly ýer. Pariždäki beýik, owadan arkaly ýaly ajaýyp Triumf arkasy. Olar ony Triumf arkasy diýip atlandyrýar we tiz wagtdan ol Waşingtonda-da bolar» — diýip, Tramp belledi.
Şeýle-de, Prezident 2026-njy ýylyň 25-nji iýunyndan 10-njy iýuly aralygynda Waşingtonda «Amerikan ştatlarynyň beýik ýarmarkasynyň» geçiriljekdigini we onda 50 ştatyň ählisiniň öz ekspozisiýalaryny hödürlejekdigini habar berdi. Garaşsyzlyk güni baýramy, däp bolşy ýaly, feýerwerk we awiasiýa uçuşy bilen utgaşar. Mundan başga-da, 14-nji iýunda Ak tamyň çäginde garyşyk başa-baş söweş boýunça ýaryş geçiriler. Söweşijileriň sanawy entek belli däl, ýöne Tramp «sekiz ýa-da dokuz titul söweşiniň» meýilleşdirilýändigini habar berdi.
