Fransiýanyň milli ýygyndysynyň we Londonyň “Arsenalynyň” ady rowaýata öwrülen hüjümçisi Týerri Anri karýerasyndaky ajaýyp üstünlikleri üçin "Lifetime Achievement" (Ömrüniň dowamynda gazanylan üstünlik) baýragyna mynasyp boldy. Sylaglamak dabarasy 18-nji dekabrda "BBC Sports Personality of the Year 2025" çäresiniň çäginde geçirildi.
BBC media korporasiýasynyň wekilleri fransuz futbolçysynyň häzirki zaman oýunçysynyň keşbine täzeçe garaýyş girizendigini bellediler. Guramanyň ýolbaşçylary Anriniň oýun aň-paýhasyny, tebigy zehinini we dünýä sportuna ýetiren uly täsirini aýratyn nygtadylar.
Ozal bu mertebeli baýraga Pele, Billi Jin King, Dewid Bekhem we ser Bobbi Çarlton ýaly dünýä meşhur türgenler mynasyp bolupdy.
"Futbol maňa hemme zady berdi, men bolsa oňa bütin durkum bilen berildim. Bu baýrak arkaly futbol taryhynda ykrar edilmek, janköýerleriň we topardaşlarymyň ýüreginde yz galdyrmak — men munuň gadyryny elmydama bileris" diýip, Anri dabarada çykış etdi.
Dabaranyň esasy baýragyna — "Ýylyň sport şahsyýeti" adyna bolsa demirgazyk irlandiýaly meşhur golfçy Rori Makilroý mynasyp boldy.
