Fransiýanyň milli ýygyndysynyň hüjümçisi Kilian Mbappe öňki kluby «Pari Sen-Žermene» garşy tölenmedik zähmet haklary we bonuslar bilen bagly kazyýet işinde ýeňiş gazandy. Parižiň Zähmet dawalary boýunça kazyýeti «PSŽ-ni» futbolça rugsat tölegleri bilen birlikde 61 mln ýewro tölemäge borçlandyrdy.
Şol bir wagtyň özünde, klubuň öňki oýunçysyna 440 mln ýewro möçberindäki maliýe talaplary doly ret edildi.
Çözgüt şu gün, 16-njy dekabrda biragyzdan kabul edildi. Klub kazyýetiň doly kararyny bir aýyň dowamynda öz resmi saýtynda ýerleşdirmeli. Klubuň karara garşy şikaýat arzasyny bermäge hukugy bar.
Ozal, 2024-nji ýylyň sentýabrynda Fransiýanyň Professional futbol ligasy (LFP) «PSŽ-ni» Madridiň «Realyna» mugt geçen hüjümçä zähmet haky we bonuslar boýunça tölenmedik 55 mln ýewrony tölemäge borçlandyrypdy. Ýöne klub Liganyň özüne garşy şikaýat arzasyny berenden soň, bu iş kazyýete geçirildi.
Maliýe talaplaryndan başga-da, Mbappe klubuň üstünden psihologik basyş üçin şikaýat edip, «PSŽ-ni» 2023-nji ýylda täze şertnama baglaşmaga mejbur etmekde günäkärledi, şol wagt ol esasy düzümden wagtlaýyn çetleşdirilipdi.
