30-njy noýabrda irden (Aşgabat wagty bilen) “Inter Maýami” MLS Kubogynyň pleý-offunyň ýarym finalynda “Nýu-Ýork Sitini” uly hasap bilen utdy. Fort-Loderdeýldäki oýun 5:1 hasabynda tamamlandy.
Bu oýun şol bir wagtyň özünde MLS-iň Gündogar konferensiýasy 2025-iň finaly boldy.
“Inter Maýami” Tadeo Alýendeniň het-trigi, şeýle-de Telasko Segowiýanyň we Mateo Silwettiniň gollary bilen garşydaşyny uly ýeňlişe sezewar etdi. “Nýu-Ýork Sitide” ýeke-täk goly Jastin Hak geçirdi.
Ýeňiş topary MLS Kubogynyň finalyna çykardy we konferensiýanyň kubogyny getirdi. Messi üçin bu karýerasynda 47-nji we “Inter Maýaminiň” düzüminde üçünji kubok boldy. Ozal ol “Barselona” bilen 35, Argentinanyň milli ýygyndysy bilen alty we “PSŽ” bilen üç kubok gazanypdy.
Oýunda hüjümçi bir assist edip, bu görkeziji boýunça Ferens Puşkaşyň rekordyny täzeledi. Indi onuň karýerasynda 1136 oýunda 405 assist bar. Puşkaşyň hasabynda 404-di.
Hawýer Maskeranonyň topary-da MLS-iň rekordyny goýdy: yzygiderli çempionatda we pleý-offda bir möwsümde 98 gol. Bu görkezijiniň esli bölegini gazanmaga 38 ýaşly Messi kömek etdi, ol yzygiderli çempionatyň iň gowy bombardiri we pleý-off tapgyrynyň ikinji iň köp gol geçiren oýunçysy boldy.
6-njy dekabrda “Inter Maýami” MLS Kubogy 2025-iň finalynda “San-Diego” – “Wankuwer Uaýtkeps” ýarym finalynyň ýeňijisi bilen oýnar (bu şol bir wagtyň özünde Günbatar konferensiýanyň finaly).
