Orta agramda UFC-niň çempiony Hamzat Çimaýew BAE-den Nigma Galaxy kibersport klubunyň ilçisi boldy. Bu barada guramanyň saýtynda habar berilýär.
Indi ol klubuň ýaşlar akademiýasynyň höweslendiriji we bilim maksatnamalaryna gatnaşar. Çimaýew kibertürgenler bilen duşuşyp, tertip-düzgün, taýýarlyk we türgen hökmünde pikirlenme barada gürrüň berer. Şeýle-de, ol ýaş oýunçylara durnuklylygy, zähmet etikasyny we sanly gurşawa jogapkärli çemeleşigi ösdürmäge kömek eder.
“Çimaýew tertip-düzgüni we tutanýerliligi görkezýär, bu hem biziň klubumyzyň gymmatlyklaryna laýyk gelýär. Onuň bilen hyzmatdaşlyk adaty sport bilen kibersporty birleşdirmegi, şeýle-de ýaşlary topar bolup işlemäge we netijä ymtylmaga ruhlandyrmagy maksat edinýär” – diýip, Nigma Galaxy-nyň esaslandyryjylarynyň biri Mohamed Morad belledi.
Çimaýewiň asly Çeçnýadan, ýöne UFC-de Nigma Galaxy-nyň ýerleşýän ýeri bolan BAE-niň baýdagy bilen çykyş edýär. Sosial ulgamlarda ol ençeme gezek Dota 2 oýny bilen gyzyklanýandygyny görkezipdi. Türgen başga-da birnäçe halkara brendler bilen hyzmatdaşlyk edýär. Onuň baýlygy 4 mln dollar diýlip hasaplanýar.
Çimaýew UFC-de 2020-nji ýyldan bäri çykyş edýär. Ol karýerasynda 15 söweşe gatnaşdy we ählisinde ýeňiji boldy. 2023-nji ýylyň güýzünde ýedi söweş barada şertnama baglaşdy. Türgeniň aýtmagyna görä, ýedi ýeňiş oňa, takmynan, 20 mln dollar getirip biler: häzir ýene dört söweş galdy.
Onuň soňky söweşi 17-nji awgustda boldy we GAR-dan Drikus dýu Plessini ýeňip, orta agramda UFC-niň çempiony boldy. Sportskeeda-nyň maglumatlaryna görä, Çimaýewiň söweş haky 1,8 mln dollar boldy – bu karýerasynda iň uly mukdar. Ol UFC-niň taryhynda ýeňlişsiz guşak gazanan 16-njy söweşiji boldy.
Häzir Çimaýew agram derejesine garamazdan UFC-niň iň gowy söweşijileriniň reýtinginde dördünji orny eýeleýär. 2025-nji ýylyň sentýabrynda ol sosial ulgamlarda indiki söweşiniň 2026-njy ýylyň iýunynda Ak tamda meýilleşdirilýän UFC ýaryşynda geçip biljekdigine yşarat etdi. Ol rezidensiýanyň siluetini ýatladýan emojini goýup, Braziliýadan ýarym agyr agramda çempion Aleks Pereýra bilen söweş geçirmegi teklip etdi.
