Toyota indiki nesil GR Corolla hetçbeginde 1,6 litrlik turbinaly üç silindrli hereketlendirijini 400 a.g. kuwwatly täze dört silindrli hereketlendiriji bilen çalyşmagy meýilleşdirýär. Bu barada Carscoops neşiri ýazýar.
Japan Mobility Show 2025 sergisinde kompaniýa täze Corolla-nyň konseptini we birnäçe täze hereketlendirijileri görkezdi. Olaryň arasynda 2,0 litrlik turbinaly dört silindrli hereketlendiriji tapawutlanýar. Ol häzirki üç silindrli hereketlendiriji bilen deňeşdirilende has ykjam, netijeli we gurluş taýdan ýönekeýdir.
Toyota-nyň güýç enjamlarynyň ýolbaşçysy Takaşi Uýehara täze hereketlendirijiniň diňe bir kuwwatly däl-de, eýsem önümçilikde aňsatdygyny, şeýle-de inženerleriň häzirki üç silindrli hereketlendirijini döretmekde ýüzbe-ýüz bolýan wibrasiýa meselelerini aradan aýryp, has saz işleýändigini belledi.
Kompaniýa GR Corolla-nyň indiki nesliniň boljakdygyny nygtady. Tehniki müdir Hiroki Nakajima Toyota-nyň içinden ýandyrylýan hereketlendirijileri ileri tutmagy dowam etdirýändigini we uglerod taýdan bitarap ýangyjy ulanmak mümkinçiligini hem öwrenýändigini belledi.
