ABŞ-nyň awiasiýa pudagyndaky ýagdaý dowam edýän şatdaun sebäpli barha kynlaşýar. Ulag ministri Şon Daffi CNBC bilen söhbetdeşlikde uçuşlar howpsuz däl diýlip hasaplanan ýagdaýynda hökümetiň ýurduň howa giňişligini ýapyp biljekdigini aýtdy.
“Eger biz muny howpsuz däl diýip hasaplasak, tutuş howa giňişligini ýaparys” – diýip, Daffi aýtdy.
Onuň sözlerine görä, şeýle çözgüt entek kabul edilmedi, ýöne howa gatnawlarynyň ulgamy üçin töwekgelçilik gün-günden ýokarlanýar. Geçen hepde Federal raýat awiasiýa edarasy awiadispetçerleriň ýetmezçiligi sebäpli howa menzilleriniň birnäçesinde hereketleri gowşatdy. Nýu-Ýork sebitindäki uçuşlara hyzmat edýän käbir dispetçer merkezlerinde işgärleriň tas 80%-i ýokdy.
Bloomberg agentliginiň maglumatlaryna görä, ABŞ-nyň iň uly 30 dispetçer merkeziniň ýarysy işgärleriň ýetmezçiligi bilen ýüzbe-ýüz boldy. FlightAware portalynyň maglumatlaryna görä, geçen anna güni 6200-den gowrak gatnaw gijikdirildi we tas 500 sanysy ýatyryldy. Awiakompaniýalar bökdençligiň 3,2 milliondan gowrak ýolagça täsir edendigini habar berýär.
Hökümet işiniň togtadylmagy eýýäm 35 gün bäri dowam edýär, şonuň üçin 13 müň töweregi awiadispetçer zähmet haksyz işleýär. Bu ABŞ-nyň taryhynda dowamlylylygy boýunça ikinji şatdaun boldy.
Şatdaunyň resmi sebäbi ABŞ-nyň Kongresiniň federal agentlikler üçin degişli maliýeleşdirmäni tassyklamandygy boldy. Demokratlar hökümet maliýeleşdirmesi baradaky kanuna lukmançylyk ätiýaçlandyryşy üçin ýeňillikleri uzaltmak barada punkty goşmak isleýär – bu hem goşmaça 1,5 trln dollar bölüp bermegi göz öňünde tutýar.
