Toyota kompaniýasy SEMA amerikan sergisi üçin öz týuning taslamasyny hödürledi. Ulag üçin esas hökmünde Corolla Cross gibrid krossoweri alyndy we ol birnäçe aksessuarlaryň kömegi bilen başdangeçirmeler hem-de tebigatda işjeň dynç alyş üçin niýetlenen awtomobile öwrüldi.
Prototip Corolla Cross Nasu Edition adyny aldy we Toyota-nyň sergide görkezjek, takmynan, ýigrimi ulagynyň ilkinjisi boldy.
Krossoweriň daşky görnüşi täze “gyýakly” öň bamperiniň, şeýle-de giňeldilen tigir arkalarynyň, täze diskleriň we Toyo Open Country A/T III tekerleriniň kömegi bilen üýtgedildi. Ýolsuz ýerden ýöremek üçin ýol klirensini artdyrýan lift-toplumy oturdyldy.
Goşmaça aksessuarlaryň arasynda üçekde bagaž ýeri, sendtraklar, goş saklaýyş ulgamy we bagaž sowadyjysy, şeýle-de dag welosipedi üçin berkitme bar. Toyota interýeriň üstünde-de gaýtadan işlenendigini belledi, ýöne bu barada giňişleýin maglumat ýok.
Konserniň resmi beýanynda Corolla Cross Nasu Edition-yň gezelençler üçin diňe bir ramaly SUV ulaglarynyň däl, eýsem has ýeňil modelleriň hem amatly bolup biljekdigini görkezmelidigi aýdylýar.
